乖仔,有時真係唔好恨..

乖仔,有時真係唔好恨..
有時同honeymeow傾開佢太后食藥好乖, 唉, 依d乖,真係唔好恨。今日深有同感。
近幾日,金妹成日悶悶不藥, 開頭我以為佢嬲我依排成日出街唔理佢, 我聞佢個口仔又無太臭,所以由佢自已natural down下就算。
但尋晚我特登早d番屋企陪兩位大帝, 金金由始都終都里埋係窗台,開埋條金金隧道都無心情玩, 真係有d唔對路。
等老公番黎後, 兩個人"mak"開佢口仔睇下, 原來有一邊喉嚨仔紅哂起埋粒粒白色野,發哂炎。
唔怪得依排金仔食少左野啦, 我地仲話Sugar肥左,但金金無再肥, 嗚~原來喉嚨仔咁痛呀。
依個貓奴真係無用, 成日掛住去街攪人地d貓, 都唔理下兩個仔。
即晚已經用醫生之前介紹的粉粉加落發炎的牙肉附近。
今朝再用強力洗牙水清潔下發炎部份, 強力洗牙水其實係人用黎醫生口瘡或口生飛滋 (老陳話過可以開稀比動物用), 我自已都試過, 超級難頂, 用完之後好苦好麻痹咁。雖然已經開稀一半,但金金咁細隻貓, 已經覺得好苦苦。但金金真係好乖仔, 剩係流口水, 無乜爭扎, 之後仲要再加Lactoferrin粉粉落發炎地方。一路迫佢做佢最怕的事,一路讚佢好乖仔, 隻衰仔好有性咁點然接受。完左後, 比d蟹柳絲佢食, 佢個口苦到連食最心愛的蟹柳絲, 都吐番出黎。 見到佢咁淒涼樣, 真係心都痛埋。
有時點解d貓乖, 係訓練出來的。成日要食藥，成日要刷牙仔, 日日年年月月咁做, 由唔鐘意好抗拒,都會變成逆來順受。如果係咁, 要d貓咁乖黎做乜野?! 我情願佢地扭我計, 百厭就百厭。因為身體唔舒服,所以咁乖, 我真係唔想要。