可憐3隻貓地

今晚去探個朋友,佢之前養左3隻貓。除左一隻安哥拉係買的,其他兩隻都係被遺棄後佢收養的。

因為佢生左個人類B, 所以將d貓轉哂去佢亞媽到養, 又將隻安哥拉賣番比鋪頭 (頂!!! 攪乜春呀!間鋪頭又會收?! 可憐隻貓女未絕育, 我真係驚係依個原因果間pet shop先收番隻貓要黎生!!!) 我問咁其餘兩隻貓點? 佢話等到個人類BB大到起碼1-2歲先接番黎養。 (唔好play我啦!! 1、兩年後先接番黎,咁即係唔會接番黎啦~!) 然後佢仲話,其中一隻叫肥豬的波斯貓自從去左佢亞媽屋企,老左好多。頂!!!!!! 隻貓成11歲, 之前又咁痴主人, 而家無端端送左去第二個屋企。我係貓都心情低落啦! 以前陪睇電視,跟出跟入,而家比主人唔要, 諗起真係好慘。以前我上去, 依隻肥豬係迎賓貓, 會招呼客人咕咕聲好開心的。一隻咁痴人類的貓比人類拋棄, 比著我,唔好話老,癲都有份。

我對住個朋友,都唔知講乜好。雖然自問我鐘意貓。但我明白家家有難念之經。 開始愛,一向好容易, 離棄貓地的話,之前幾愛、幾乜乜物物, 只要心想離棄就自然有一千個一萬所謂理由。幫亦幫唔到咁多,始終人地家事。 但知道後真係有d唔開心, 始終同佢d貓都有點點感情,總算梳過毛、解過結、比過玩具同野食, 好彩果時佢叫我幫佢地沖涼,我唔制姐, 唔制仲多感情, 唉~。

番到屋企,見到Sugar, 有d傷感, 心想: 如果有一日我唔要Sugar, 佢一定會超級勁唔開心, 鬱鬱不歡都死都似, 隻衰仔雖然頗氣大d,但我知佢其實好親我。正如好多人講, 貓係我地生活一部份,但我地就係貓的全部了。我們少了一部份, 最多失落一陣子, 但貓,尤其咁認主人黎痴的衰仔, 被主人遺棄,我疼不願再想下去。Anyway, 除非我死先架姐, 否則應該無乜野可以令Sugar無左我從依個貓奴。成日係到諗, 老公定Sugar同金金, 我真係會揀Sugar同金金多過人類, 更莫講話其他野可以離間到我同兩隻仔。

養貓..開頭真係好過癮, 但當有感情落去後, 就好奶野。好地地無事無幹就無乜野,有病係上黎都幾金, 我預左隻衰仔幾年後會"浸"住洗我一大筆, 可以"浸"住洗,而佢又享受貓生的, 我情願佢洗我d錢。亦都預左要棉乾碎濕咁照顧佢食藥打皮下水之類, 依種我相信真係要有心理準備好精神抗戰先可以堅持到。其實真係唔講得笑, 貓地有病起上來而又決定支撐佢地, 真係精神金錢同時間上都好金。我真係唔敢再養第三隻, 我知我未到handle得到, 我指當佢地有事, 年齡大時的照顧。

但無論點都好, 只要佢肯繼續, 我都會堅持Sugar同金金只要從第一日我認左佢地係我隻仔, 佢地一世都係我隻仔。大家有粥食粥, 有飯食飯, 希望我食飯時間多過食粥啦。

*相中就是肥豬