差唔多一年了.........

記得去年4月,亞妹發現左豆丁。我"蟻"媽咪暫時收養住丁丁, 依個係我舊年的生日願想。話咁快就一年了, 隻臭丁都同我地相處左一年,雖然佢百厭, 又蝦媽咪, 但總算生性,識睇眉頭眼額, 擦鞋擦到足, 屋企上上下下都咁錫佢。前排亞妹仲同佢一齊癲, 抱高佢去捉鹽蛇, 攪到鹽蛇又甩左條尾, 人類又嚇到死死下,貓地又忙到死死下 (要搵番條鹽蛇出黎嘛~)。雖然亞妹成日大聲鬧佢,但隻衰仔都好痴佢, 都無佢地兩個咁好氣。

原本聽日諗住同一家人去沙田食飯當慶祝自已生日, 但諗諗下沙田離公司好遠咁, 所以之後改左去鑽石山, 但今日塔塔下車諗起,如果去鑽石山食,咪無得同丁丁一齊興祝生日囉 !!??!!(我當佢同我同一日生日就算啦~反正差唔多日子,我又唔知佢幾時出世,就當屋企肯養佢果日當生日啦!) 就因為咁,我又改地點,最後尾決定番去食就算,咁樣我可以開罐罐同三文魚乾乾比佢興祝生日。

愈來愈覺得..貓地生日好似重要過人類咁。